Government of Greenland

09/24/2021 | Press release | Distributed by Public on 09/24/2021 09:08

Qaanaamut angallavimmi timmisartuussinerit pitsannguiffigineqassapput

Qaanaamut angallavimmi timmisartuussinerit pitsannguiffigineqassapput

24.09.2021
Amerikami Department of the Air Force Pituffiup (Thule Air Base) Kalaallit Nunaata avannaanut timmisartuussinerni mittarfittut pilersaarutaasumik qinigassatut atorneqarnissaanut akuersivoq. Ilaatigut Pituffimmi kiffartuussinermut isumaqatigiissummi isumaqatigiissutit ataatsimoortut, tamatumunnga atatillugu atorfillit allaffigeqatigiiffigisaasa kingunerisaannik isumaqatigiissutigineqarpoq, Air Greenland Pituffimmik mittarfittut pilersaarutaasumik qinigassatut atuinissaanut akuerineqassasoq.

Akuersissutip atuutilerneratigut Air Greenlandip Qaanaamut timmisartuussinermini arlaannik naatsorsuutiginngisamik peqquteqarluni missinnaatinnani Pituffik mittarfittut pilersaarutaasumik qinigassatut atorsinnaavaa. Maannamut timmisartuussinerni taakkunani mittarfiit kujasinnerusut qinigassatut atorneqarnissaat pisariaqartarsimavoq, tamatumalu kingunerisaanik oqimaassutsit killeqartinneqartarput, taamatut pisoqartillugu ikummatissaq annertooq usineqartariaqartarmat.

Pituffik Qaanaamut qanittumi inissisimavoq, taamaalillunilu Kalaallit Nunaata avannaanut angallassineq pitsaanerulissaaq, ilaatigullu piffissamik eqquisinnaaneq annertusissaaq angallavillu tutsuiginarnerulissalluni.

Ineqarnermut, Attaveqaasersuutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen oqarpoq:
"Aaqqiissutissamik inissiisoqarnera nuannaarutigaara. Taamaalilluni Qaanaamut angallavimmi, kiffartuussinermut isumaqatigiissuteqarfiusumi angalasunut pissutsit pitsaanerulersissinnaavagut aammalu Kalaallit Nunaata avannaa tamakkerlugu angallassineq patajaannerulissalluni."

Akuersissuteqarnermi Air Greenlandip aamma Pituffiup akornanni suleqatigiinneq pioreersoq ineriartorteqqinneqarpoq. Air Greenlandimi pisortaaneq Jacob Nitter Sørensen oqarpoq:
"Ukiorpassuit ingerlanerini Thule Air Base aamma USAF suleqatigilluartorujussuusimavagut. Taamaattumik Thule Air Base-p mittarfittut pilersaarutaasumik qinigassatut atorneqarnissaa pillugu aamma suleqatigiissinnaagatta nuannerpoq. Tamatuma isumarpiaa tassaavoq, Qaanaamut ilaasut, allakkat nassiussallu amerlanerusut assartorsinnaaleratsigit, tamatumunngalu peqatigitillugu silarlutsillugu timmisartuussinerup sunnertianera annikillisussaasoq."

Suleqatigiinneq pitsaanerulersinniarlugu suliniutit allat, siorna isumaqatigiissutigineqartut uani atuarneqarsinnaapput.

Annertunerusumik paasisaqarusunnermi Ineqarnermut, Attaveqaasersuutinut Naligiissitaanermullu Naalakkersuisoqarfik attaveqarfigineqassaaq, uunga: [email protected]