Government of Greenland

09/28/2021 | Press release | Distributed by Public on 09/28/2021 07:21

Seqininnguaq Nordic Pioneer Prize 2021-mik nersornaaserneqarnerani pilluaqquarput

Seqininnguaq Nordic Pioneer Prize 2021-mik nersornaaserneqarnerani pilluaqquarput

28.09.2021
23. september 2021-mi Seqininnguaq Qitura Lynge Poulsen Nordic Pioneer Prize 2021-mik nersornaaserneqarpoq. Nersornaat kattuffimmit Nordic Safe Cities-imit nunani avannarlerni inuusuttunut, inuiaqatigiinni avissaartuunnissamut, uumissuinissamut immikkoortitsinissamullu akiuiniarnermi immikkut suliniuteqarsimasunut tunniunneqartarpoq.

Seqininnguup suiaassutsit, atoqatigiittarneq tarnikkullu peqqissuseq pillugu saqqummiussai oqallisaasunut ilanngunneqarsimapput, sulilu inuit tamat akornanni oqallinnermi paquminassusii annikilliartorlutik. Qulequttat taakku oqaasertalerneqarneri assigiinngissuseqarnerup nalinginnaanerulernissaanut alloriarneruvoq pingaarutilik, kisiannili siulliulluni alloriarnissaq aammalu paqumigisat pillugit oqallisilernissaq akuttunngitsumik ajornakusoortinneqartarpoq. Taamaattumik Seqininnguup suliniutaasa akuersaarnissaat ingerlatsinissamullu kajumissarneqarnissaa pingaaruteqarpoq.

Ineqarnermut, Attaveqaasersuutinut, Aatsitassanut, Inatsisinik Atuutsitsinneqarnerannut Naligiissitaanermullu Naalakkersuisoq Naaja H. Nathanielsen oqarpoq:
"Siullermik pingaarnertullu Seqininnguaq pilluaqquarput. Inuusuttut qulequttanut paqumigisanut akiuiniarnerat takullugu nuannaraara, neriuppungalu Seqininnguaq allanut, inuusuttuuppata utoqqaappatalu, inuiaqatigiinni eqqartugassat ajornakusoortut oqallisiginissaannut ammaassinissamut isumassarsiuiumaartoq. Suiaassutsit atoqatigiittarnerlu suli inuit tamat politikerillu akornanni oqallisaasariaqarput, oqaloqatigiinneq immikkoortitsinissamut akiuiniarnermi sakkussaammat pingaarutilik. Naalakkersuisuni oqallittoqarnerani tusarnaarnissarput anguniartarparput, aammalu oqallisaasut inuiaqatigiit naligiinnerulersinniarlugit sulinitsinni atortarlugit."

Annertunerusumik paasisaqarusunnermi Ineqarnermut Attaveqaasersuutinut Naligiissitaanermullu Naalakkersuisoqarfik [email protected] aqqutigalugu attaveqarfigineqassaaq.