Government of Greenland

10/01/2019 | Press release | Distributed by Public on 10/01/2019 12:33

Uummannami angallat assartuisussaq

Naalakkersuisut septembarip 30-iani aalajangerput Royal Greenland A/S-p umiarsuaa Sermilik Uummannami inissinneqarnissaa akuerineqassasoq.

Aalajangerneq peqquteqarpoq Uummannami erngup uuliamik mingutsinneqarnerata kingunerisaanik nunami tunitsiviup matoqqanerani oqilisaassiniarnermik.

Akuersissut atuutsinneqassaaq Uummannami aalisakkanik tunisasssiornermi erngup atorneqartup uuliaarunnissaata tungaanut.

Umiarsuup Sermiliup aalisakkat pisat suliarineqanngitsut Uummannamiit Royal Greenlandip tunitsiviinut allanut assartortassavai. Matumani eqqartorneqarpoq pingaartumik umiarsuaq Uummannamiit Ilulissanut Qasigiannguanullu uteqattaarluni angalasassasoq.

Naatsorsuutigineqarpoq umiarsuaq Sermilik ulluni qaninnerni Uummannamut apuutissasoq.

Paasissutissanik suli allanik, uani taaneqanngitsunik pissarserusukkaanni Aalisarnermut, Piniarnermut Nunalerinermullu Naalakkersuisoqarfimmut saaffiginnittoqarsinnaavoq, e-mail: [email protected]