Government of Greenland

10/04/2019 | Press release | Distributed by Public on 10/04/2019 04:40

Inuussutissarsiornermut, Nukissiuuteqarnermut, Ilisimatusarnermullu Naalakkersuisoq Uummannami pisortat suliffeqarfiutaanni sulisunik innuttaasunillu ataatsimeeqateqarpoq

Inuussutissarsiornermut, Nukissiuuteqarnermut, Ilisimatusarnermullu Naalakkersuisoq, Jess Svane 3. oktobari 2019-imi Uummannami innuttaasunik imermik imerneqarsinnaasumik pilersuineq pillugu innuttaasunik ataatsimiisitsivoq.

Jess Svane aallarniilluni imatut oqarpoq: 'Pissutsit Naalakkersuisut ilungersunartutut isigaat. Nalinginnaasumik imermik pilersorneqannginneq unammillernarpoq ilungersunarlunilu. Nukissiorfinni imermik pilersuinerup piaarnerpaamik nalinginnaasunngortinneqarnissaa Naalakkersuisut neriuutigilluinnarpaat'.

Jess Svanep suliniutit Nukissiorfinni aallartinneqarsimasut ingerlaavartumik ataqatigiissaarneqarnissaat paasissutissiisarnissallu siunertaralugit oqartussaasunik pineqartunik ataqatigiissaarinerit pillugit ataatsimeeqatigeqqullugit Nukissiorfiit qinnuigisimallugit Jess Svane nangilluni paasissutissiivoq. Taamatut ataatsimiittarnerit ajornartorsiummik piaarnerpaamik aaqqiissutaaqataassasut neriuutigineqarpoq.

Pissutsit iluarsiniarlugit suliniutit nutaat arlallit aallartinneqarsimasut Jess Svanemit aamma Nukissiorfinnit oqaluttuarineqarput, tassunga ilanngullugit makku:

• Umiarsuaq assartuut Sermilik Uummannamut tikissaaq, taamaalilluni Royal Greenlandimut aalisakkanik tunisisoqaqqissinnaalerumaarluni.
• Nukissiorfiit tarajuiaatit marluk Uummannamut tikisinniarpaat, taamaalilluni illoqarfimmi aalisakkanik tunisassiorneq allatullu imermik pilersuinerit siunissami qaninnerusumi qulakkeerneqarniassammata.
• Nukissiorfiit misileraavik, laboratoria, angallattagaq Uummannamut tikisinniarpaat, taamaalilluni imeqarfimmik erngullu aqqutaannik saliinerit sukkanerusumik ingerlanneqarsinnaalissammata.
• Nukissiorfiit Uummannami septembarimut oktobarimullu innaallagissamut imermullu akiligassanik akileeqqusinianngilaq.

Innuttaasut ataatsimiisinneqarneranni apeqqarissaartoqarluarpoq, oqaaseqaateqarluartoqarpoq siunnersuutitsialannillu siunnersuuteqartoqarluni. Ilaatigut makku apeqqutigineqarput:

• Qanoq ilillutik Nukissiorfiit erngup aqqutaat salinniarpaat. Imermi uulia inatsisit malillugit killissarititaasup ataaniilernissaata tungaanut erngup aqqutai atortulersuutillu imermik kuutsitsivigalugit salittuarniaraat Nukissiorfiit ilaatigut paasissutissiipput.
• Apeqqutit allat isertitassaagaluanik annaasaqarnermut taarsiivigitittoqarsinnaanersoq ilagaat. Nammineq sillimmasiisarfiutigisap suliassamik Nukissiorfiit sillimmasiisarfianut suliassaq pillugu qulajaasinnaasumik attaveqartoqassasoq Nukissiorfiit siunnersuutigaat.
• Imermut imigassamut uuliamik kuutsitsisoqarsimanera pillugu peqqissutsimut kingunerluutaasinnaasut apeqqutigineqartut ilagaat. Nammineq peqqissuseq ernumassutigigaanni peqqinnissaqarfimmut attaveqartoqassasoq Nukissiorfiit kaammattuutigaat.
• Peqqinnissaqarfimmi, pisortat suliffeqarfiutaanni, meeqqerivinni qatserisartunilu sulisut, namminerlu kajumissutsimik ikiuisimasut suliamik ajunngilluinnartumik suliaqarsimanerat pillugit nersualaarneqartorujussuupput.
• Namminerisamik angerlarsimaffinni imermut tankit immerneqarsinnaanersut innuttaasut paaserusuppaat. Misissuiffik, laboratoria, angallattagaq Uummannamut tikisinneqarpat angerlarsimaffinni imermut tankit misissorneqarsinnaalissapput tamatumalu kingorna nakkutilliisutut oqartussaasunit akuerineqaraanni imermut tankit imermik saligaatsumik immerneqarsinnaalissapput.
• Innuttaasut kikkut angerlarsimaffiinut imermik pajuttorneqartassanersut aamma apeqqutigineqarpoq. Illoqarfimmi sumiiffinnut arlalinnut imiisivinnik inissiiortornikkut innuttaasut tamarmik imermik imigassamik pisinnaalernissaat pingaarnerpaatinneqartoq Nukissiorfiit paasissutissiissutigaat.

Jess Svanep unnuk naggaserlugu imermik pilersuinerup iluarsinissaata tungaanut suliassaq Naalakkersuisut qanimut malinnaaffiginiaraat ilaatigut erseqqissaatigaa. Tamatuma saniatigut isummersuuterpassuit Naalakkersuisoqatiminut ilisimatitsissutigissallugit Jess Svanep neriorsuutigaa.

Tamatuma saniatigut Naalakkersuisoq Jess Svane aamma Nukissiorfiit sisamanngornermi pissutsit pillugit Avannaata Kommuniata sinniisaannik Uummannamiittunik, meeqqerivimmi Nuunumi, Utoqqaat Illuanni aamma napparsimmavimmi sulisunik, Uummannami upalungaarsimasunik aamma Meeqqat Angerlarsimaffianni sulisunik ataatsimeeqateqartarput.

Imermik mingutsitsisoqarnerani pissutsit qanoq ulluinnaat sunnertigisimaneraat pillugit sulisorpassuarnik pitsaasumik tigussaasunillu oqaloqateqartoqarpoq, tassunga ilanngullugit illoqarfimmi sumiiffinnut assigiinngitsunut imiisivippassuarnik atuinikkut qanoq ililluni aaqqiissutissanik nutaanik nassaartoqarsimanersoq.

Tassunga tunngatillugu Jess Svane imatut oqarpoq: 'Innuttaasut tamarmik ulluinnarni oqinnerusumik inuulernissaannut isummersuuterpassuit siunnersuuterpassuillu nuannaarutigaakka, tassunga ilanngullugit utoqqaat, meeqqat minnerunngitsumillu napparsimasut. Isummersuuterpassuit tamakku suleqqinnissatsinnut nassassavavut'.

Paasissutissanik sukumiinerusunik pissarsiniarnissamut attaveqarfissaq tassaavoq Naalakkersuisup allattaa, Helene S. Pedersen, Inuussutissarsiutinut, Nukissiuuteqarnermut Ilisimatusarnermullu Naalakkersuisoqarfik, oqarasuaat +299 55 59 86, e-mail: [email protected]