Government of Greenland
Government of Greenland
07/22/2021 | Press release | Distributed by Public on 07/22/2021 06:46
Biskopinngortitsinissap kinguartinneqarnera
Biskopinngortitsinissap kinguartinneqarnera
22.07.2021
Naalakkersuisut ulloq 10. juni 2021 nalunaaruteqarput biskopinngortitsinissap siorna 22. november pisussaagaluartoq maanna 1. august pisussanngortinneqartoq pillugu.
Kisiannili sapaatip akunnerata kingulliup ingerlanerani COVID-19-ip innuttaasut akornanni tunillaassuunnera annertunerusoq pisimavoq, tamatumalu kinguneralugu killilersuinernik assigiinngitsunik eqqussisoqarnera. Piffissamilu matumani inerteqqutaavoq illup iluani aaqqissuussisoqarsinnaanera ingerlatsinernik assigiinngitsunik inuit 20-init amerlanerusut peqataaffigisaannik.
Biskopinngortitsinissaq ilagiinni pisussat annerpaat ilagisussaammassuk kissaataavoq ulloq nalliussineqassasoq periaatsit tamatumani ileqquusut nalinginnaasut naapertorlugit, sapinngisamillu ilagiinniit annertuumik peqataaffigineqartumik, tamannalu pissutsit maanna atuuttut iluanni ajornarluni. Piffissami matumani killilersuinerit 30. juli 2021-p tungaanut atuupput, kisiannili nalorninaateqarmat killilersuinerit pineqartut sivitsorneqarumaarnersut Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup Biskoppeqarfik isumasioreerlugu aalajangiuppaa biskopinngortitsinissaq piffissaligaanngitsumik kinguartinneqarallassasoq.
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter Olsen tamatumunnga atatillugu imatut oqaaseqaateqarpoq : Soorunami assut uggornarpoq aammaarluta biskopinngortitsinissaq kinguartittariaqaratsigu. Amerlavugut ullormut nalliussisassatsinnut qilanaarsimasut, kisianni pingaaruteqarpoq nunatsinni ilagiit nutaamik biskopinngortitsinissatsinni nalliuttorsioqataanissaat, piffissamilu matumani nalorninaateqarmat tamanna pisinnaanersoq, Biskoppeqarfik isumasioreerlugu pisussaq kinguartipparput.'
Sukumiinerusumik paasisaqarusukkaanni attavissaq:
Line Hasselriis (Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik)