Government of Greenland

10/30/2019 | Press release | Distributed by Public on 10/30/2019 07:01

Kalaallit Nunaanni ILO-mut tunngasumik ataatsimiititaliorneq

Suliffeqarfimmi suliassaqarfimmi nunat tamalaani suleqatigiinnermik Kalaallit Nunaata sammisaqarneranik siuarsaaqataasussamik Kalaallit Nunaanni ILO-mut tunngasumik ataatsimiititaliornissamut Naalakkersuisut aallarniisimapput.

Kalaallit Nunaanni ILO-mut tunngasumik ataatsimiititaliaq takkuttussaq tassaavoq illua'tungeriinnik pingasunik ilaasortaaffiusutut ataatsimiititaliaq, tassaasunik Namminersorlutik Oqartussanit sinniisut, kiisalu nunatsinni sulisartut aamma sulisitsisut kattuffiinit sinniisuutitanit inuttalik, tunngaveqarfigaalu Aatsitassanut Suliffeqarnermullu Naalakkersuisoqarfik, pilersinneqarporlu Sulisarneq pillugu Nunat tamalaani Kattuffimmi, ILO-mi apeqqutini suliffeqarfimmi suliassaqarfiusumi illua'tungeriit pingasut suleqatigiinnerisa ataqatigiissaarlugillu siuarsaaviginissaat siunertaralugit.

ILO Naalagaaffiit Peqatigiit ataaniippoq, siunertaraalu nunat tamalaani sulisarneq pillugu najoqqutassiinikkut inooqatigiinnermi naapertuutsitsinissaq, naammaginartunillu suliffeqarnermi atugassaqarnissaq. ILO asseqanngitsumik illua'tungeriinnik pingasunik ilaasortaaffeqartutut iluseqarpoq, naalagaaffiit, sulisitsisut sulisartullu nunarsuarmit tamarmit sinniisuutitat sulinermi najoqqutassat ammasumik oqaluuseralugillu pilersitarisarlugit. ILO nunanik 187-inik ilaasortaqartoq, suliffeqarfimmilu pissutsinut tunngasunik isumaqatigiissutinik 180-it sinnerlugit akuersissuteqarsimasoq 2019-imi ukiunik 100-liinerminik nalliuttorsiorsinnaavoq.

Kalaallit Nunaanni ILO-mut tunngasutut ataatsimiititaliap siunertaraa makkuninnga suliaqartarnissaq:
 ILO-p suliarisaanut nunatsinnit pingaarnertut isumaasunut, aammalu piffissamut qanittumut ungasissumillu iliuuserisat qanoq pingaarnersiornissaanut tunngatillugit isummanik oqaluuserinnittarnerit.
 Isumaqatigiissutinut tunngatillugu isummanik, aammalu tassunga atatillugu suliarisinnaasanik oqaluuserinnittarnerit.
 Naleqquttunik akuttoqatigiissaartunik siusinnerusukkut nunatta tungaanit akuerineqarsimanngitsunik isumaqatigiissutinik akuerisaareersimasunik akuerinnissinneraanerit oqaluuserisarneri.
 Isumaqatigiissutaareersimasutut isumaqatigiissutinik atorunnaarsisitsisinnaanerit oqaluuserisarneri.
 ILO-mi suliaqarnermi nunatsinni pingaarnersiukkat ilungersuussallu siuarsarnissaannut pilersitaasinnaasunik oqaluuserinninnerit.

Tamanna ilutigalugu ILO-mut tunngatillugu ataatsimiititaliaq ILO-mik ilisimanninnermik aamma isumaqatigiissutinik innuttaasunut siammartereqataassaaq, taamaalillutik innuttaasut isumaqatigiissutit suliffeqarfimmut pingaaruteqassusiannik ilisimasaqartitaalissammata. Aammattaaq ataatsimiititaliami ilaasortat ukiumoortumik ILO-mut nalunaaruteqartarnernut atatillugu aalajangersimasutut tusarniaaffiusarput.

ILO-mut tunngatillugu ataatsimiititaliaq minnerpaamik ukiumi ataasiarluni ataatsimiittassaaq, inuttarissavaalu suliffeqarfimmi illua'tungerisanit sinniisut, kiisalu ajornanngippat immikkut ittutut soqutigisaqaqatigiit, ataatsimiititaliami sammisassaq tamatuminnga kaammattuisitsissappat.

Sammisanik suliassaqarfik Danmarkimit Namminersorlutik Oqartussanit tamakkiisumik tiguneqarpat nunap ilaaffigilissallugit kissaatigisaanik isumaqatigiissutinut sorlernut Kalaallit Nunaat nammineq aalajangiisinnaassuseqarpoq. Kalaallit Nunaannut atuuttussaasunik ukiut ingerlanerini Danmarkip ILO-mi isumaqatigiissutit 16-it akuersissutigisimavai, taakkulu Kalaallit Nunaata ILO-mut namminersuutigalugit nalunaaruteqarfigisarpai. Kalaallit Nunaat isumaqatigiissummik akuersissuteqarusussappat isumaqatigiissutip atuutsilernissaanut malittarinissaanullu pisussaaffigisaqassaaq, ilanngullugu ILO-mut ingerlanneqartuartumik namminersuutigisamillu nalunaaruteqartarnissaq.

ILO-p isumaqatigiissutaani arfineq-pingasut tassaapput qitiusutut isumaqatigiissutitut taaneqartartut, sammisanik suliffeqarfimmi tunngaviusutut tunngavigisatut pisinnaatitaaffittullu isigisanik matussusiisut. Ulloq manna taakkunanit arfinilinnut Kalaallit Nunaat ilaavoq, sinneri marluk 2020-21-mi akuersissutiginissaat pilersaarutaallutik.

2019-imi qitiusutut isumaqatigiissummut C111-mut nunagisami nangaanartoqarfiusoq Kalaallit Nunaata atorunnaarsippaa, tassani pineqarput suliffissaqarnermut inuussutissarsiorfimmullu tunngatillugu assigiinngisitsisarnerit, ilaallutik immikkoortitsinerit, avataaniisitsisarnerit imaluunniit iluaqutissaliisarnerit ammip qalipaataa, suiaassuseq, upperisaqarneq, naalakkersueriaatsitigut isumaqarneq, nunamit namminermit imaluunniit inooqatigiinnit pinngorfeqarneq il.il. Tamanna naligiissitsinissamut inuiaqatigiit pingaarnersiuinissamik kissaateqarneranik - aammalu piumassutsimik takutitaqarnermik - alloriarneq pingaartuuvoq.

Nunat tamalaani suleqatigiinnermut, ILO-mut Kalaallit Nunaata ilusilersukkamik akisussaaqataanermik pisussaaffilera tassavoq pingaaruteqarlunilu ilorraap tungaanoortoq.

SIK oqarpoq:
'Naalakkersuisoqarfiup nunatsinni ILO-mut tunngatillugu ataatsimiititaliornissamik siunertaqarnera SIK-p iluaralugu isumaqarfigaa.
SIK-p tusagassiorfinnut nalunaarutip […] imarisai tapersersorsinnaavai.
ILO-mi suliassaqarfimmut tunngatillugu suleqatigiinnerup nangeqqinnissaa SIK-p qilanaaraa!'

Tusagassiuutitigut nalunaarut manna pillugu paasissutissat sukumiinerusut, Aatsitassanut Suliffeqarnermullu Naalakkersuisoqarfiup pisortaanut Jørgen T. Hammeken-Holmimut saaffiginninnikkut, pissarsiarineqarsinnaapput: Oqarasuaat: (+299) 346846 email: [email protected]