PEPA O FAAMATALAGA: Green Climate Fund – Laufanua ‘Apovai i Vaisigano Lua Aso o le Soʻo Tu’ufaʻatasi mo Galuega Faatinoina ua ma’ea ona Fa’ata’atiti’a

8 Iuni, 2021 - O le valaaulia fa'aaloalo ma le aloaia o Paaga uma a le Malo o Samoa e aofia ai Matagaluega o le Soifua Maloloina; Matagaluega o Galuega, Felauaiga ma Atinae tetele; Matagaluega o Punaoa Faalenatura ma le Siosiomaga ma le Pulega o Felauaiga ile Eleele; Matagaluega o Tina ma Tama'ita'i, Atina'e o Nu'u ma Afioaga ma Agafeso'ota'i; Matagaluega o le Va i Fafo ma Fefa'atauaiga; Pulega o le Suavai; Fa'amalu mo Fa'alapotopotoga Tuma'oti a Samoa (SUNGO); Fa'alapotopotoga Pisinisi Tuma'oti a Samoa (Chamber of Commerce); Polokalame o Fesoasoani mo Sosaiete, Faalapotopotoga mo tagata Lautele, CSSP; Ofisa mo Pisinisi Laiti ma le Faalapotopotoga Tumaoti a le au fai Pisinisi ma le Faalapotopotoga mo Atina'e a le Malo Aufa'atasi (UNDP), i le polokalame o le a faatautaia e le Pulega o le Poloketi i lalo o le faamalumaluga a le Matagaluega o Tupe lea o lo'o fa'auluulu ma ta'ita'ia le poloketi atoa. Ua fuafuaina lenei polokalame mo le Aso 9 i le Aso 10 o Iuni, 2021, i le faletalimalo ole Sheraton Samoa Aggie Grey's Hotel & Bungalows. O le Ofisa Sili a le Matagaluega o Tupe, le Susuga ia Leasiosiofa'asisina Oscar Malielegaoi, o le a saunoa i le Saunoaga Autu e tatala aloaia ai le polokalame ua fuafuaina mo le Lua Aso.

O le polokalame soʻo tu'ufaʻatasi a paaga uma o le poloketi mo Laufanua 'Apovai ole Vaisigano o se avanoa lelei mo paʻaga e auai fa'atasi e talanoaina ma fa'amalamalamaina tulaga ua iai faʻatinoga o galuega, o lu'itau ma faʻafitauli ma tagataga'i ini auala e foʻia ai lu'itau ma fa'afitauli faʻafuaseʻi. O loʻo fuafuaina ai foi le iloiloina ma toe fetuʻunaʻi o fuafuaga o galuega faatino e faʻamaonia ai le auiliiliina o galuega ua ma'ea ona fa'ata'atitia a le poloketi faapea vaegatupe manaomia e tau ile iuga o le atina'e ia Iulai 2023.

O le poloketi Laufanua 'Apovai i Vaisigano o le la'asaga a le Malo i vaega fa'atino e fo'ia ai lologa ma e 3 ona galuega fa'atino:

1. Suesuega ma iloiloga i auala e gafataulima ai faafitauli ogaoga ma isi aafiaga mai lologa

2. Fausaga o aseta ma meatotino ile Laufanua 'Apovai i Vaisigano ia mausali ma mafai ona gafataulimaina aafiaga ogaoga o lologa

3. Fa'aleleia Alavai i nofoaga maualalalo ia vave foia ma faaitiitia lologa ma tafega

O le ala manuia mai le Green Climate Fund o lo'o fa'aaogaina i galuega e fa'aleleia ma fa'aitiitia ai a'afiaga mai lologa ma tafega aemaise fa'alavelave tutupu fa'alenatura lea ua fa'aigoaina nei o le 'Fuafuaga Tu'ufatasia mo le mata'ituina o lologa ina ia fa'aleleia le tali atu i a'afiaga ole tau i Laufanua 'Apovai ole Vaisigano', po'o le GCF-VCP 'Laufanua 'Apovai ole Vaisigano' ma o le poloketi pito i tele nei o lo'o iai a le Malo o Samoa. E $65.7 miliona tupe Amerika o lo'o fa'atupeina ai lenei poloketi, o le foa'i tu'ufa'atasi a le malo ma le GCF, e $57.7 miliona tupe Amerika le fesoasoani a le GCF ma le $8 miliona tupe Amerika a le Malo o Samoa, ma o lo'o lagolagosua iai le Faalapotopotoga mo Atina'e a Malo Aufa'atasi (UNDP). E 6 tausaga o lo'o fa'atautaia ai lea poloketi, na amatalia i le masina o Iulai o le tausaga 2017 ma o lo'o fa'amoemoe e fa'amaeaina i le tausaga 2023.