Government of Greenland

08/31/2021 | Press release | Distributed by Public on 08/31/2021 08:51

Inissialioriaaseq nutaaq Qaanaami atoqqaarfissiorneqartoq

Inissialioriaaseq nutaaq Qaanaami atoqqaarfissiorneqartoq

31.08.2021

Inatsisartut Aningaasaqarnermut Akileraartarnermullu Ataatsimiititaliap 4. aggusti 2021-mi Naalakkersuisut suliassamut aningaasanik atugassanngortitsinissamut akuersissuteqartoqanissaanik qinnuteqaataat akuerimmagu, Qaanaami inuusuttunut inissiat arfinillit sananeqarnissaanni alloriarneq pingaarutilik pisussanngorpoq.

Tamatuma peqatigisaanik illulioriaaseq nutaamik ineriartortitaq inuusuttunut inissianut atorneqarluni nunarsuatsinni atoqqaarfissiorneqassaaq. Najoqqutassap siunissami nuna tamakkerlugu illoqarfinni minnerusuni nunaqarfinnilu atorneqarsinnaanissaa pilersaarutigineqarpoq. Inissiat uiguleriiupput ataatsimut sananeqartussat. Taamaalilluni silami iikkat ikinnerit atorneqassapput, taamaalillunilu kissamik annaasaqartarneq annikinnerulissalluni. Tamatuma kingunerisaanik najugaqartoq aningaasartuutinik ikinnerusunik atuisassaaq. Nutaatut inissiat tamarmik inissianut minnernut naleqqussakkanik pequsersorneqassapput.

Ineqarnermut, Attaveqaasersuutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja Hjelholt Nathanielsen oqarpoq:

'Inissiat naammassippata takunissaannut qilanaarpunga, neriuppungalu najoqqutassaq atorluarsinnaassasoq, taamaalillunilu sumiiffinni allani aamma atorsinnaassalluni. Aamma nuannaarutigaara Qaanaami suliassaq illoqarfimmi nutarterinermik pilersitsisussaammat, inuusuttunut inissiat nutaat nutaaliaasullu sananeqarnerinut peqatigitillugu illutoqqamik isaterititsisussaagatta. Qaanaami najukkami ataatsimiititaliaq kiisalu Avannaata Kommunia suliaq pillugu suleqatigiinnitsinnut qutsavigaakka.

Illoqarfimmi inuusuttorpassuit inuiaqatigiinni najukkaminniiginnarnissartik kissaatigisarpaat, kisiannili inissianik naleqquttunik nassaarnissaat ajornakusoorpoq. Inuusuttunut inissiat arfinillit nutaat sananeqarneri inuusuttut Qaanaami najugaqaannarnissaannut tapertaasussaavoq.

Inissiat 2023-mi upernaakkut iserterfigeriaannanngortussat sananeqarnissaat pillugu KJ Greenland A/S isumaqatigiissuteqarfigineqarpoq.

Inissiat avannaaniit isigalugit. Inissianut isaarissat avannamut sammisuupput.


Inissiat kujataanit isigalugit. Inissiat kujammut sammisuupput, immamut isikkiveqarlutik aammalu nalunaaquttap akunneri seqinnerfiit atorluarneqarsinnaapput.


Inissianut isaarissat avannamut sammisuupput.


Inissiat kangianit isigalugit.

Aneerasaartarfiit kujammut sammisut immamut isikkiveqarput.


Init alliit.

(Takussutissiortoq: ©2020 Qarsoq tegnestue ApS)

Annertunerusumik paasisaqarusunnermi Ineqarnermut, Attaveqaasersuutinut Naligiissitaanermullu Naalakkersuisoqarfik attaveqarfigineqassaaq, uunga [email protected].