Government of Greenland

10/09/2019 | Press release | Distributed by Public on 10/09/2019 10:52

Namminersorlutik Oqartussat inissiaataannik inoqanngitsunik kusassaaneq –Nuuk Nordisk Kulturfestival-imut ilaatinneqartoq

Ineqarnermut Attaveqaqatigiinnermullu Naalakkersuisoqarfiup ilaqutariinnut arlalinnut inissiat inoqanngitsut assersugaasut Namminersorlutik Oqartussanit pigineqartut pillugit Nuummi Eqqumiitsulianik Saqqummersitsivik, Nunatta Katersugaasivia aamma Rene Design, suleqatigilerpai.

Naalakkersuisoq Karl Frederik Danielsen oqarpoq:
'Namminersorlutik Oqartussat inissiaataasa ilai nunarput tamakkerlugu siammarsimasut isatigassaannanngorput. Isaterinernut suliassat ingerlaavartumik neqeroortitsivigineqartarput aammalu akuttoqqatigiimmik ingerlanneqarlutik, taamaalillutik sumiiffinni entreprenørit suliassanut neqerooruteqarnissamut periarfissaqarlutik. Tamanna najukkami suliffissaqartitsiniarnermut iluaqutaavoq. Taamaattoq tamatuma aamma kingunerisaanik inissiarsuit piffissami aalajangersimasumi inoqaratik uninngaannartarput aammalu illoqarfimmi takussunartarlutik. Kusassaanermut suliniut piffissami aalajangersimasumi, illuutit isaterneqarnissaasa tungaanut, illoqarfimmi takujuminarsititsilersinnaavoq aammalu nutaanik silamiiffissaqalernissamut periarfissaqalersitsisinnaalluni.'

Suliniutip kingunerisaanik assiaqutit ullumikkut illuutini igalaanut matunullu assiaqqutsiussat, eqqumiitsulianik taarsersorneqassapput. Suliniut pingasunut immikkoortunut agguarneqarsinnaavoq, tassani immikkoortuni tamaginni eqqumiitsuliat assigiinngitsuussallutik.

1. Sacha Malinsky (Cheeky), Kalaallit Nunaanni, pingaartumik Nuummi aamma Sisimiuni streetart workshops-inik misilittagaqartoq, suleqatigineqalerpoq. Katuami inuusuttunut, assiaqutinik 'live' painting atorlugu qalipaasinnaasunut, workshop-ertitsisoqassaaq, taamaalilluni suliap ingerlanera malinnaaffigineqarsinnaassalluni. Workshop, Nuuk Nordisk Kulturfestival-imut atatillugu oktobarimi sapaatit akunnerani 41-imi ingerlanneqassaaq. Assiaqutit qalipanneqartut tamatuma kingorna 'Trussely' eqqaani inissianut inoqanngitsunut nivinngarneqassapput.

2. Nunatta katersugaasiviata eqqumiitsuliatoqqat, sivisuumik toqqorsivimmiitinneqarsimasut, assilisimavai. Assiaqutsiussat eqqumiitsulianik najukkameersunik imaluunniit allanik illoqarfimmit pineqartumeersunik najoqqutaqarluni, assiaqutit krydsfineriusut kusanarpallaanngitsut kusassarlugit, assigiinngitsunik assiliartalersorneqarnissaat isumassarsiaavoq. Taamaalilluni assiliartai illuutinut inoqanngitsunut kusassaataaginnassanngillat, kisianni aamma eqqumiitsuliornerup oqaluttuassartaanik illoqarfiup ilaani takussutissiissallutik. Titartaalluni ilusilersuisartup aamma tunisassiornermut suliffeqarfiup najukkameersup - Rene Design - assiliartassaasa plakatini takussutissiani qajannaatsuni silamiilluarsinnaasunillu, plade-nut nipputsinneqarsinnaasunut, nuutinnissaat isumagissavaa.

3. Rene Design assilisanik inuit igalaat tunuaniitillugit takutitsisussanik suliaqassaaq, taamaalilluni inuit illup iluaniittutut isikkoqartinneqassallutik. Assilisat taakkua assiaqutinut ikkunneqassapput, aammalu illoqarfimmi ataatsimi nivinngarneqassallutik.

Assiliartassaannik sanasoqalinnginnerani angissusissaa nalinginnaasoq kiisalu assiaqutit pisariaqartinneqartut amerlassusissaat paasinarsisinneqassapput. Suliaqarneq taanna ingerlanneqarpoq, tamatuma kingorna illoqarfinni assigiinngitsuni assiaqutit ikkussorneqarnissaat aallartinneqarsinnaalissalluni. Tamanna INI A/S suleqatigalugu ingerlanneqassaaq.

Matumunnga apeqqutissaqarnermi saaffigeqquneqarpoq Naalakkersuisup allattaa Anders Samuelsen, [email protected]