Government of Greenland

09/22/2017 | Press release | Distributed by Public on 09/22/2017 12:48

Sikuki Nuuk Harbour ammarpoq

Umiarsualivittaap ammarneranit assit takukkit.

Naalakkersuisut Siulittaasuata Kim Kielsenip Nuummi umiarsualivittaamik ammaanermi oqalugiaataa:

(Oqaatigineqartut atuupput)

Asasakka tamassi,

Kalaallit Nunaata umiarsuarnut atlantikukkoortaatinut umiarsualivissaata atoqqaartinneranut peqatigalusi ullumikkut Naalakkersuisut sinnerlugit peqataasinnaagama nuannaaqaanga. Umiarsuarnut atlantikukkoortaatinut nunatta sinneranut attaveqaasersuinermut ineriartortitsinissamullu annertuumik pingaaruteqartussamik qitiusumik umiarsuaqalernissamik ukiorpassuarni kissaaterput ullumikkut piviusunngortinnera nalliuttorsiutigaarput.

Nunani allani umiarsualiviliortiternerit aningaasaliinissamut inuussutissarsiutinillu ineriartortitsinissamut kajumilersitsisarput. Royal Arctic Line-p containerinut inissiisarfissani allaffeqarfissanilu atulerpatigit massakkut umiarsualiviusumi atuisut siunissamilu atuisussat inissat, atortussat siunissamilu suliaminnik annertusaasinnaanissaat eqqarsaatigalugit pitsaanerusunik atugassaqalissapput.

Sikuki Nuuk Harbour-imi sulisut, qullersat siulersuisullu sulilluarsimanerinik Naalakkersuisut sinnerlugit annertuumik qujassuteqarfigaakka. Taamatuttaaq Peter Aarsleff sulisuilu sanaartukkamik isumaginnissimanerinut qujassuteqarfigaakka. Umiarsualivissap nutaap sanaartornerani suleqataasimasut pilersueqataasimasullu allat qujassuteqarfigaakkattaaq.

Qaaqqusatta Gustav Skifte-p Nuummi umiarsualivik allanit nalunnginneruaa. Guustaat 1972-imi ilinniakkani naammassigamiuk Nuummi umiarsualivimmi aqutsisutut atorfinitsinneqarsimavoq. Ukiut arlallit aalisartooreerluni Guustaat 1993-imi Royal Arctic Line-mi pilersinneqarlaami sulilerpoq - ukiullu 20-t ingerlanerini umiarsuaatileqatigiinni atorfinni assigiinngitsuni atorfeqartarnermigut umiarsualivimmi kiinnat ilisarnarnerpaat ilagilersimavaat.

Taamatut oqaaseqarlunga nuannaarutigaara umiarsuarnut atlantikukkoortaatinut talittarfittaarput Guustaat Nuummi umiarsualivimmik ukiorpassuarni siuttuulluni sulisimasoq peqatigalugu atoqqaarfissioqatigisinnaagakku.

Umiarsuarnut atlantikukkortaatinut talittarfittaap siunissami nunatsinni kinguaariippassuarnut ineriartortitsinermut ataqatigiinnermullu iluaqutaanissaa neriuutigaara. Taamaattumik umiarsualivittaap pisortatigoortumik atoqqaartinnerani Guustaap ernutani Maalia kinguaariit tullinnguuttussat sinnerlugit peqataasutut ilagisinnaammagu nuannaaqaanga. Maaliap qalersaq aappaluttoq qiussavaa.

Sikuki Nuuk Harbour Royal Arctic Line-ilu nutaarsuarmik suliffittaarnerannik Naalakkersuisut sinnerlugit pilluaqquakka. Qularutiginngilara umiarsualivittaarput ilissinni nunattalu sinneranit iluaqutigineqalerumaartoq.