Regjeringa tek grep for å frigjere kapasitet i NOKUT

Nyheit | Dato: 09.04.2024| Kunnskapsdepartementet

Frå 1. januar 2025 skal Direktoratet for høgare utdanning og kompetanse overta ansvaret for dei nasjonale spørjeundersøkingane om studiekvalitet. Det gjeld studiebarometera og undervisarundersøkingane.

Arbeidet med studiekvalitet skal styrkast og samlast i Direktoratet for høgare utdanning og kompetanse (HK-dir). HK-dir får eit overordna koordineringsansvar for statistikk, analyse og informasjonsarbeid om studiekvalitet i norsk høgare utdanning og høgare yrkesfagleg utdanning frå 2025. Nasjonalt organ for kvalitet i utdanninga (NOKUT) skal bli meir reindyrka som eit fagleg uavhengig organ med akkrediterings-, tilsyns- og evalueringsoppgåver.

- Denne endringa er eitt av fleire strukturelle grep vi tek for å auke studiekvaliteten. No samlar vi oppgåver som naturleg høyrer saman, og vi frigjer viktige ressursar i NOKUT, seier forskings- og høgare utdanningsminister Oddmund Hoel (Sp).

Betydninga for NOKUT

Oppgåva med evalueringar av studiekvalitet blir verande i NOKUT. Det er ei lovheimla oppgåve som føreset fagleg fristilling. NOKUT får også behalde budsjettmidlane for tilsette knytt til studiebarometera og andre undersøkingar.

Betydninga for HK-dir

I statsbudsjettet for 2024 overførte regjeringa 200 millionar kroner til universiteta og høgskulane for å styrke det desentraliserte og fleksible studietilbodet. Pengane blei flytta frå program og tilskotsordningar som HK-dir forvalta. Dermed blir det frigjort kapasitet i HK-dir knytt til avvikling av tilskotsordningar.