EUROMAINT-EK TRENEN MANTENTZE LANETARAKO BERE TAILER MODERNOENA INAUGURATU DU SUEDIAN

2024/03/11

EuroMaintek, tren-zerbitzuak hornitzen dituen eta egoitza Suedian duen CAF Taldeko enpresak, 2024ko martxoaren 8an, ostiralean, inauguratu zuen mantentze-lanetarako zentro modernoa. Zentroak 35.000 metro koadro ditu eta trenbide-lautada eta 7.500 metro koadroko tailerra biltzen ditu. Zentro berria Suediako Nässjö-n dago, kokapen estrategikoan, eta CAF Krösatåg-en lineetako operazioetarako Transitio AB enpresari entregatzen ari den tren berrien mantentze-lanak egiteko erabiliko dute.

Instalazio berriei esker, 2014an sinatutako esparru-akordioaren arabera Suediako AB Transitio enpresa publikoak eskualdeko trenen erosketarekin lotuta CAFi esleitu zizkion trenen mantentze-lanak egin ahal izango dituzte. Oinarri-kontratuak bakoitzak 4 kotxe izango dituen 20 EMUren (unitate elektrikoak) eta 8 BMUren (biodiesel-elektrizitate bidezko unitate bimodalak) fabrikazioa jasotzen du. Azken horiek 3 kotxekoak izango dira eta power-car bat ere barne izango dute. Akordioan jasotakoaren arabera, gainera, unitate kopurua handitzeko aukera dago. Kasu horretan, beste 19 EMU eta 7 BMU izango lirateke. Oinarri-kontratuaren bolumena 250 milioi euro baino gehiagokoa da eta zenbateko hori ia bikoiztu egingo litzateke kontratuan jasotako ibilgailu osagarrien aukera guztiak gauzatuko balira.

Instalazioak tailerrean bost biderekin ekipatuta daude. Gainera, negu-garairako garbiketako eta desizozketako sistema automatikoekin konbinatutako aretoa ere badu zentroak. Tailerra, gainera, ordezko piezak hornitzeko fluxu arina errazteko diseinatuta dago. Horretarako, paternoster erako biltegi automatikoa eta biltegiratzeko 130 metro koadroko azalera egokitu dituzte. Proiektua aurrera eramateko, kontuan hartu da jasangarritasun-programa, helburu hauek dituena: elektrizitate berriztagarria erabiltzea, material ekologikoak erabiltzea, azaleko uren kudeaketa jasangarria eta garraio-jarduera minimizatzea.

"Eskandinaviako merkatuan inbertsio handia egiten ari gara. Horren erakusgarri da Eskandinaviako herrialdeetan mugarri bihurtuko den trenen mantentze-lanetarako tailer hau, gure LeadMind plataforma digital aurreratuaren bidez martxan jarri duguna. Suediako trengintzaren sektorerako zedarria da eta lanerako ingurune seguruagoa eta zirkulazioaren erabilgarritasun handiagoa ekarriko ditu berekin", azaldu du Gorka Tamayok, EuroMaint Gruppen AB enpresako CEOak.

2019an, CAF Taldeak Suediako EuroMaint enpresa, herrialde hartan trenen mantentze-lanen sektorean liderra, erosi eta, hala, Eskandinaviako herrialdeetan zuen presentzia sendotu zuen. EuroMaint da, duela hainbat urtetik, Eskandinaviako tren-merkatuan erreferentziazko enpresetako bat eta trenetako floten mantentze-lanen sektorean merkatu-kuota handia du. Enpresa horrek, gainera, jarduera eskualdeko operadoreei zuzendutako tren-elementuen hornidurarekin bateratzen du. Gaur egun 1.000 langile inguru ditu eta haren urteko sarrerak 200 milioi euro ingurukoak dira.