Áslaug Arna ræddi gervigreind á ráðherrafundi OECD

Áslaug Arna ræddi gervigreind á ráðherrafundi OECD

[Link]Frá ráðherrafundi OECD um vísindi og tækni.

• Facebook Link
• Twitter Link

Áslaug Arna Sigurbjörnsdóttir, háskóla-, iðnaðar, og nýsköpunarráðherra, sótti í liðinni viku ráðherrafund OECD um vísindi og tækni, þann fyrsta sem haldinn er síðan árið 2015. Fundurinn fór fram í París og var yfirskriftin Sameiginlegar áskoranir, umbreytandi aðgerðir(e. Shared challenges, transformative actions). Þar var áhersla m.a. lögð á á þær áskoranir og tækifæri sem OECD-ríkin standa frammi fyrir þegar kemur að tækniframförum, ekki síst gervigreind. Þá ræddu ráðherrarnir hvernig best megi nýta vísindi og tækni til að mæta samfélagslegum áskorunum landanna.

Í ræðum sínum á fundinum ræddi Áslaug Arna nýlegar breytingar á stefnumörkun vísinda- og tæknimála á Íslandi, sem og hvernig stjórnvöld hafa notið góðs af nýlegri úttekt OECDá framlögum íslenska ríkisins til rannsókna og þróunar. Stuðst verður við skýrsluna við áframhaldandi stefnumörkun í málaflokknum. Þá nefndi Áslaug að nauðsynlegt sé að tryggja að gagnaöflun með gervigreind ýti ekki undir eða ýki það ójafnræði sem þegar er til staðar í vísindastarfi, gögnum og miðlun vísinda.

Auk ráðherra taldi sendinefnd Íslands á fundinum m.a. fulltrúa Íslands í stjórn stefnumarkandi nefndar OECD um vísindi og tækni (CSTP) og fastafulltrúa Íslands gagnvart OECD.

Í tengslum við ráðherrafundinn hafa tvær stefnumarkandi skýrslur á vegum OECD verið gefnar út:

• An OECD Agenda for Transformative Science, Technology and Innovation Policies

• An OECD Framework for the Anticipatory Governance of Emerging Technologies