SAUNOAGA AUTU AFIOGA TUALA TEVAGA IOSEFO PONIFASIO SUI PALEMIA / SUI MINISITA O TINA MA TAMA’ITA’I, ATINA’E O NU’U MA AFIO’AGA MA AGAFESO’OTA’I I LE POLOKALAME MO LE FUATAGA O[...]

Susu o lau susuga i le Ta'ita'i o le sauniga: Reverend Esekielu

Alaiva'a (Faafeagaia o le Ekalesia Metotisi i Satuiatua)

Afifio Minisita o le Kapeneta, Afifio Sui o Malo mai fafo.

Susu Fa'auluuluga o Matagaluega ma Fa'alapotopotoga ale Malo, Pisinisi ma Vaega Tumaoti

Afifio o Ta'ita'ifono ma Sui o Fono Fa'avae o Itumalo o Upolu nei

Le paia ma le mamalu o le auvala'aulia

Afifio, ia matuau'u, o le au se'e papa ma tina uma o Samoa

Le mamalu ma le paia eseese o Samoa ua potopoto

Ua atoa usu taeao e ono o Samoa, e pei o le upu ia Fulu'ula-a-le-fanua ma Fulu'ula-a-le-matoto. Ae e pei o upu i le gataifale, e i ulugalu pea li'aga o le tai, ona o le popo'e ile siui o le papa aua e faigata ou paia, o sā ma faigā o Samoa o le aomamala, i le afifio mai o mamalu taue'e o Samoa ua potopoto. Tulouna, tulouna ia, tulouna lava.

O lea ua mae'a ona totō le niu o le tuaoi i lo tatou va tapuia ma le Tapa'au Sili i le Lagi sa fofogaina e le Susuga ile Fa'afeagaiga.

Fa'afetai tele i lau susuga ile fa'afeagaiga mo le upu folafolaina i lenei taeao e fa'amalosia'u, ao se ūnaiga musuia mo le mamalu ua afifio nei.

O le asō e taualuga ai le polokalame mo le Fa'amanatuina o le Aso Faapitoa mo Tinā uma o Samoa 2024 e ala i le "Polokalame o le Fuataga o le Ie Samoa ma le Faaaliga o Siapo 2024", i le Autu: "IA FUTIAFU E TASI MO AVANOA TUTUSA". "O se lauie e tasi e mafai ona ausia sina matalalaga itiiti, ae a tele lauie e lalaga faʻatasi, e mafai ona mae'a mai ai le Measina a Samoa". O le loto gatasi lea o tinā ma tama'ita'i ile limalimaina poo le lalagaina o lena measina, lea ua mafua ai le asō.

O le Fuataga o le ie Samoa ma le Fa'aaliga o Siapo, o se taumafaiga a le Malo o lo'o ūna'ia ai le lalagaina o Measina a lo tatou atunu'u, o le ie Samoa ma le gaosiaina o le Siapo. Ua āu tausāgā ona fa'atinoina e tina ma tama'ita'i Samoa le lalagaina o le ie Samoa, peitai fa'atō'a aloa'ia o se polokalame tuliloa i lalo o le Matagaluega o Tina ma Tama'ita'i, Atina'e o Nu'u, Afio'aga ma Agafeso'otai ile tausaga e 2003, seia o'o mai lava ile taimi lenei.

E le o toe faigofie ona unaia atina'e a le Malo aemaise lava i lenei Measina, ina ia mautinoa e mafai ona fa'aauauina ma ia lelei atoatoa, ona ua tele o lu'itau ua feagai ai i nei ona po. O nisi o lu'itau e aofia ai le fa'aitiitia o le numera o Falelalaga na resitala ile Polokalame na tuliloa e le Matagaluega o Tina ma Tama'ita'i, ona ua tele tinā matutua ua le gafatia ona toe lalagaina le ie Samoa i ona tosi fa'atulafonoina ile "Tulafono Fa'atonutonu o Mea Samoa Fa'a- Anamua (Ie Toga) 2013".

Peita'i, o le ie Samoa, ua tulaga ese ai lava Samoa i saofa'iga uma a le Itulagi ma le lalolagi, ona o lona tulaga maoa'e e le gata i le gaosiaina, ae o lona fa'aaogaina - aua e amata mai lava i le pepe e o'o i le tagata matua, e aoga iai le ie. E lē fa'atuāoiina foi ni ie mo ali'i ma tama'ita'i, po'o le tulaga o se tagata. O le fa'atinoga fo'i o lona lalagaina ma le gaosiga, o lea ua faisao uma iai aiga i ona

itutino uma, e le gata i ali'i ae o tama'it'ai, se'ia o'o lava i alo ma fanau, e tafa pe a lautele le tosi, fafaga pe a valavala le matā lālāga, ma tulituli matāgau le ufi a le tamaitai, e lepa i le foe ae mapu i le to'o, e tusa o le fua ua uma ona tapena ai lona lalagaina, seia mae'a ma matagofie mo le fa'aleleina.

O le fa'aaogaina foi o le Ie, ua le gata i le maualuga o fa'aaloaloga a le atunu'u ma lona tumutumuga i maliu, saofa'i, fa'aipoipoga ma aso fanau, ae e pei lava o le satauro o Keriso, o le ie foi, ua to'atele pagota ua ola ai. O vaega ia, ma o itu foi ia, na mafua ai ona avea le tatou ie Samoa o se puna'oa, ua talia ma amana'ia aloa'ia e Malo Aufa'atasi, e ala i le UNESCO ma lo tatou malo, o se puna'oa ma se meafaitino anagatā ma e ao ina puipuia mo le lumana'i.

O le ie Samoa fo'i, ua avea ma alaga'oa i le to'atele o tama'ita'i o le atunu'u, e pei foi o i latou ua fa'amanuiina i lenei aso, iā latou tupe fa'ameaalofa ua tapenaina e le tatou Malo. O nei lava tupe fa'ameaalofa, e le o le tau lea o le ie, ae ua o se fa'ailoga e fa'afetaia ai e lo tatou malo lo outou gāpātia ma le fitāituga, e una'ia ma lagolago lenei polokalame. O le fa'amoemoe maualuga, ia gafataulima le lalagaina o le ie Samoa, ma una'ia malosi le lalagaina o le ie numera tasi, numera lua ma le numera tolu, faatasi ai ma le gaosiaina o siapo. O le ala lea ua le avea ai e le Malo a outou ie, ae tuu lava ile tagata lalaga ia ana ie, e fa'aaoga i sou fa'alavelave pe fa'atau fo'i mo se seleni fa'aopoopo mo le gafataulimaina o fuafuaga a le aiga.

O lenei tausaga ua maua ai fa'amanuiaga o ie mae'a tosi tasi e $1000, tosi lua maea e $800 ma le tosi tolu mae'a e $500. Mo a tatou siapo e $250 ile tasi le siapo.

Mo lenei Fuataga o ie Samoa ma Fa'aaliga o Siapo, e moni ai upu e fai i le lalagaina o lenei Measina "O lea ua fa'amau fausa" o galuega alofi-'aao o tinā ma tama'ita'i aua ua 'ae manuia le fa'atamasoali'iga ile limalimaina o ie o le malo sa outou gapatia ai. Fa'amalo le se'e, fa'amalo le limalima. Sā ō, Sā ō, Sā ō fa'alā ua lelei !

Ou te fa'afetaia ai le galuega mae'ae'a a matuau'u ma le ause'epapa o falelalaga uma o Upolu nei, aemaise o le atunu'u o lo'o lagolagoina pea lenei atina'e taua.

Mo Tinā uma o Samoa, ua tatou aga atu i le fa'amanatuina o lo outou Aso Sā Fa'apitoa. 'Ia manatua pea la outou āūliga. O la outou tautua i so'o se vaega, o ou nafatausi, ma la outou lagolago, e pei ona tatou molimauina i lenei aso.

Ona ou faapea atu ai lea, le mamalu e, o le aofia ua potopoto mai i lenei taeao, ia manuia tele le taualugaina o le Polokalame o le Ie Samoa ma Siapo 2024, aemaise o le Fa'amanatuina o le Aso Sā faapitoa o Tinā uma o Samoa, o le a tatou aga atu iai. Ia saga fa'amalosia pea outou e fa'atino measili mo le viiga o le Atua, aemaise ai o le manuia o aiga, nu'u ma alalafaga, ma tagata uma.

Soifua ma ia manuia.

Ata Pu'eina - Malo o Samoa (Leaosa Faaifo Faaifo ma Peseta Tusiga Taofiga)

See insights and ads

Boost post

All reactions:

2323

May 10, 2024

Public link

Please use the above public link if you want to share this noodl on another website.