InpAkta ‘InpAkta’ aurkeztu dute Bilbon, 22 erakundek bultzatu eta gizartean inpaktu handia duten gaiak landuko dituen aldizkari zientifikoa 2024·02·08

'InpAkta' aurkeztu dute Bilbon, 22 erakundek bultzatu eta gizartean inpaktu handia duten gaiak landuko dituen aldizkari zientifikoa

Bilboko Bizkaia aretoan egindako ekitaldian parte hartu dute Eva Ferreira EHU/UPVko errektoreak, Vicente Atxa Mondragon Unibertsitateko errektoreak, Juan Jose Etxberria Deustuko Unibertsitateko errektoreak, Rikardo Bueno Zabalo BRTAko zuzendari nagusiak eta Ugo Mayor Ikerbasque ikertzailea eta 'InpAkta' aldizkariko erredakzio-buruak.

Gaur, otsailak 8, Bilboko Bizkaia aretoan egindako ekitaldian, InpAkta Inpaktu Sozialerako Ikerlanen Akta - Journal of Research for Social Impactaldizkari zientifikoa aurkeztu dute. Ekitaldian partu dute Eva Ferreira EHU-UPVko errektoreak, Vicente Atxa Mondragon Unibertsitateko errektoreak, Juan Jose Etxeberria Deustuko Unibertsitateko errektoreak, Rikardo Bueno Zabalo BRTAko zuzendari nagusiak eta Ugo Mayor Ikerbasque ikertzailea eta InpAkta aldizkariko erredakzio-buruak.

Ugo Mayor InpAktaaldizkariko erredakzio buruak egin du aurkezle lanak eta azaldu ditu aldizkari zientifiko berri honen helburua eta ezaugarri nagusiak. Hala, Mayorrek azaldu du bi urtean behin, euskaraz eta ingelesez argitaratuko den aldizkariak jorratuko dituela arlo askotako gaiak, besteak beste, ekologia, ekonomia, medikuntza, osasun publikoa, bioetika, antropologia, ingeniaritza, geologia, hidrologia, hezkuntza, komunikazioa, inteligentzia artifiziala, albaitaritza, inmigrazioa, soziologia, genero ikasketak, hizkuntza, digitalizazioa, demografia, jasangarritasuna, elikagaiak, kimika analitikoa… Betiere, Mayoren hitzetan, helburu jakin batekin "kalitatezko ebidentzien iturri eta bilduma sortuz, gizarteak, erakundeek eta eragile desberdinek gizarte moduan dugun erronkei modu sendoago batean aurre egin diezaioten".

Bere parte-hartzean, Eva Ferreira EHU-UPVko errektoreak azpimarratu du inpaktu sozialeko gaietan ikertzearen beharra. Bere hitzetan, oso garrantzitsua da akademia mundutik sortzea "herri gisa ditugun eta izango ditugun erronka sozial eta politiko ezberdinei aurre egiteko tresnak". Vicente Atxa Mondragon Unibertsitateko errektoreak azpimarratu nahi izan du aldizkariak duen "gai desberdinak jorratzeko bokazioa". Bere ustean, era honetako proiektuek "lagunduko dute bizi dugun gizarte konplexuak dituen erronkei erantzuten". Ondoren, Juan Jose Etxeberria Deustuko Unibertsitateko errektoreak azpimarratu nahi izan du "hiru unibertsitateen artean" sortutako aldizkari zientifiko honen garrantzia. Etxeberriak nabarmendu du, gainera, aldizkariak "akademia haratago" joan nahi duela eta ahalegin berezia egingo duela dibulgazio lanak ere egiten. Ekitaldia bukatzeko, Rikardo Bueno Zabalo BRTAko zuzendari nagusiak gehitu du "gizartean erabakiak hartzerakoan, alor guztietan, ezagutzan oinarritzearen garrantzia, eta hori ahalbidetzeko ezagutza-mundua eta gizartearen arteko zubi-lanaren beharra".

22 erakundeen elkarlana

Aurkezpen publikoak hiru unibertsitateetako ordezkariek parte hartu badute ere, antolatzaileek azpimarratu nahi izan dute proietuaren zabaltasuna. Izan ere, hurrengo 21 erakundek eman diote babesa proiektuari: Euskal Herriko Unibertsitatea (UPV/EHU), Mondragon Unibertsitatea, Université de Pau et des Pays de l'Adour, Universidad de Navarra, Nafarroako Unibertsitate Publikoa (UPNA), Deustuko Unibertsitatea, CNRS IKER-UMR 5478, Agirre Lehendakari Centre, Arantzazulab, Telesforo Monzon eLab, Orkestra-Lehiakortasunerako Euskal Institutua, Université de Bordeaux, Université Bordeaux Montaigne, Basque Research and Technology Alliance, Aditech, Elhuyar Fundazioa, Eusko Ikaskuntza, Centre for Basque Studies - Reno, Boise State University Basque Studies, Udako Euskal Unibertsitatea (UEU), Cenarrusa Foundation for Basque Culture eta Soziolinguistika Klusterra.