Dita e Evropës, Hasani: Përshpejtimi i anëtarësimit të rajonit, e bën BE më të sigurt

Në Ditën e Evropës, Ministri për Evropën dhe Punët e Jashtme, Igli Hasani theksoi se procesi i integrimit duhet të përshpejtohet drejt anëtarësimit me të drejta të plota në Bashkimin Evropian.

Në panelin e diskutimit të organizuar nga MEPJ, e ku morën pjesë përfaqësues të trupit diplomatik të akredituar në Tiranë, Ministri Hasani se përshpejtimi i integrimit në BE, e bën familjen evropiane më të plotë e të sigurt.

"Prandaj, fjala kyç për Evropën sot, por sidomos për ne, është përshpejtimi i procesit të integrimit, jo ngecja në vend, jo kthimi mbrapa. Vetëm kështu Evropa do të jetë më e plotë dhe më e sigurt përkundrejt çfarëdolloj sfide brenda dhe jashtë kontinentit", theksoi Ministri Hasani.

Në panel ishin prezentë edhe Ministrja e Shtetit dhe kryenegociatorja Majlinda Dhuka, ambasadori i Bashkimit Evropian në Tiranë, Silvio Gonzato dhe ambasadori slloven Peter Japelj.

Kryenegociatorja Dhuka u shpreh se aktualisht Shqipëria po punon intensivisht për një axhendë reformash rritjeje nën planin e ri të rritjes të Bashkimit Evropian.

"Hapi ynë i radhës është përgatitja serioze për të qenë anëtar në BE. Hapat e ndërmjetëm janë progresi me reformat. Shqipëria po punon për përmbushjen e kritereve për anëtarësim deri në vitin 2030", tha ajo.

Në fjalën e tij, ambasadori i BE-së u shpreh se që tani rruga është e hapur që Shqipëria të vijojë me hapat e radhës të integrimit.

"Ne jemi të ndryshëm, por jemi një. Dera ose çelësi më saktë që do të hapi dyert ndërmjet BE-së dhe Shqipërisë, duhet të jetë dhe çelësi që hap dyert e Shqipërisë dhe Serbisë, Shqipërisë dhe Malit të Zi e me radhë sepse kjo është logjika", theksoi ai.

Ndërkohë, ambasadori slloven Japelj tha se Shqipëria është një vend i vogël ashtu si Slovenia, por me ide të qarta dhe të mëdha për të ardhmen e saj.

"Si mund të influencojë Shqipëria rajonin? Ne kemi marrëdhënie të mira me OSBE-në dhe Këshillin e Sigurimit, kështu që për Shqipërinë është një shembull shumë i mirë. Jam i lumtur që Kolegji Evropian do të hapë dyert në Shqipëri. Është një gjë e mirë për Shqipërinë dhe gjithashtu për të gjithë rajonin", nënvizoi mes të tjerash ambasadori Japejl, vendi i të cilit u anëtarësua në BE 20 vjet më parë.

Paneli, i moderuar nga Ardian Haçkaj, drejtor i kërkimit në Tirana Connectivity Forum, vijoi me një bashkëbisedim me studentë të marrëdhënieve ndërkombëtare një ekspozitë e fotografit Roland Tasho, me foto të ambasadorëve të huaj, të veshur me veshje tradicionale shqiptare të trevave të ndryshme.

Public link

Please use the above public link if you want to share this noodl on another website.