Government of Samoa

05/22/2023 | News release | Distributed by Public on 05/21/2023 20:10

SAUNOAGA AFIOGA I LE MINISITA O AOGA TA’ALOGA MA AGANU’U, HON. SEU’ULA IOANE TU’AAU

SAMOA GAMES OFFICIAL OPENING

Aso Toonai 20 Me 2023 - 6.00pm Apia Park

Ou te tula'i atu ma le agaga fa'aaloalo e fai ai a'u ma sui o le Malō o Samoa, auā le Ao Mamalu o le Malō, le Afioga i le Tama'ita'i Palemia, Ali'i ma Tama'ita'i Minisitā, ma le mamalu o le Palemene.

Le mamalu o le Fa'amasinoga ma ona itū tofia.

Afio fo'i lau afioga i le Peseretene o le SASNOC, Pauga Talalelei Pauga, ma sui mamalu o le Komiti Fa'atonu. Lea e mamalu mai Ta'aloga ma ona pulega, fa'apea alo ma fanau o Samoa.

Fa'aululuga o Matāgaluega e fia, vaega faipisinisi tumaoti ma faigapa'aga, le mamalu o Samoa ua poto i lenei itula afiafi. Talofa, talofa lava.

O le a ta'oto pea ia le fiso ma ona lau, auā lau silasila ma lau faafofoga'aga Samoa, o 'oe ua uma ona tofi.

Ae ou te mua'i fa'atulou atu i le pa'ia sasao ma mamalu o le aofia potopoto. O pa'ia lava ia o Tama ma Aiga, Aiga ma a latou Tama, Tumua ma Pule, Ituau ma Alataua, Aiga i le Tai ma le Va'a o Fonoti, ae tainane lau tapuaiga Tutuila ma Manu'a.

Fa'amālō le folau manuia, auā o lea ua o tatou aulia mai le ogatotonu o lenei tausaga, a'ō lo'o tumau pea le alofa ma le agalelei o le Atua e ala mai i lana puipuiga mo Samoa. Ia maualuga pea lona viiga.

Manatu, o le a fagasa'o le ū a le tamaloa mai Savai'i.

60 TAUSAGA O TUTO'ATASI SAMOA

O le fa'amanatuina o le 60 tausaga talu ona tuto'atasi Samoa, e le'ō se tulaga maualalo. O se pine fa'amau maualuga mo Samoa, ma le Pasefika, aeā le lalolagi atoa, i le sao ma le finau o Toa o Samoa, o latou ua fai i lagī le folauga. Malo tau.

TA'ALOGA

O le sao o ta'aloga i atina'e o Samoa, e atili fa'aosofia ai le finafinau ma le tauivi, o lo'o fa'aupegaina ai le to'atele o alo ma fanau, o faiaoga ma asosi ese'ese o ta'aloga, aemaise le mamalu o le atunu'u sa avea ma avefu'a o Samoa i ta'aloga, i tausaga ua mavae.

A'ō i latou e tu'umai lo latou taimi ma le fesoasoani e aunoa ma se taui, o Toa manumanu ia o taaloga (volunteers).

Ae o le SAMOA GAMES 2023, o se auala taua lenei e fa'ailo atili ai atina'e o ta'aloga, i Samoa nei. O le'ā le sao o Ta'aloga mo Samoa?

  1. O le aiā tatau o tagata e auai i so'o se ta'aloga e tausiniō ai, e fiafia ai, ma fa'amasani atu ai i isi ona tagatanu'u i le agaga ma le loto fealofani (social cohesion);
  2. O le avea lea o ta'aloga e fesoasoani i le soifua maloloina o tagata, e auala mai i le fa'agaioiina o le tino (physical activity), ma le a'oa'otauina o tagata i totonu lava o ta'aloga (physical education/physical literacy);
  • O le maua lea o avanoa e tausiniō ai i ta'aloga tetele i le itulagi ma le kelope lautele (regional and interntional games participation);
  • O ia fo'i avanoa, e malaga atu ai o tatou tagatanu'u i atunu'u mamao ma maua ai avanoa mo galuega i totonu o ta'aloga ma fafo a'e o ta'aloga;
  • Ae o le avea o fanau e fai ma avefu'a o Samoa, o se mitamitaga lea i aiga, mafutaga fa'alēnu'u ma alalafaga, fa'apea mafutaga fa'aleagaga, ma le lautele o Samoa (national pride);

Sa tatou molimauina le Pacific Games 2019 lea sa talimalō ai Samoa. Sa va'aia le lolofi mai o tagata asiasi mai i Samoa, mai atunu'u mamao. O sē tasi lea sao e sili ona taua mo le tamāoaiga o Samoa (indirect economic contribution by sports) o tupe fa'aalu a tagata mo Samoa. Lea ua tatou molimauina i lenei vaiaso o le Samoa Games.

O 'upu masani fo'i a Samoa, faimai, e leai se faiva e asa maumau. Ae a momo'o fo'i le tautai i le i'a, e le manumanu i lana upega. E fa'apenā se manatu.

E fa'afetaia le SASNOC ma ana faigapa'aga pei ona folasia i lenei afiafi. Fa'amalō le tapena i Asosi o Ta'aloga uma. Fa'afetai mo lō outou sao lautele, lea e molimauina pea e le Malō o Samoa ma Samoa atoa.

O le upu fa'a-Samoa, faimai: "E mālie le siva a le manaia ona o le 'ai'aiuli ma le lagolagosua a le matapō". O le'ā matou tapua'i atu, ae o maia e alo i o outou faiva malie.

Lea ou te fa'apea atu ai, ia manuia le Samoa Games 2023.

Manuia fo'i lau tapuaiga mamalu Samoa, a'ō alo atu i le fa'amanatuina o Lou Tūto'atasi.

O lenei ua tatala aloaia le SAMOA GAMES 2023!

Soifua.

[Link] May 22, 2023